GEBEDSOPROEP
Spesiale Sinode van die NGK: 7-10 November 2016
Die NG Kerk het ‘n spesiale Sinode 7-10 November 2016 om weer te besin oor ‘n besluit oor selfdegeslag verhoudinge en selfdegeslag huwelike wat die Algemene Sinode in 2015 geneem het. Daar was intussen groot verwarring, ongelukkigheid, teleurstelling en selfs woede oor die besluit by baie mense. Hierdie buitengewone byeenkoms van die Algemene Sinode vind volgende week in Pretoria plaas en het groot konsekwensies vir die Afrikaanse kerk in die breë, maar ook vir die kerk in die algemeen in ons land. Ons wil jou graag uitnooi om saam te verenig in gebed vir hierdie baie belangrike waterskeidingsvergadering. Die volgende kan dien as enkele gebedsriglyne om oor hierdie uiters sensitiewe saak te bid.
1. Gesag van die Woord. Bid vir die Sinode om sonder kompromis die gesag van die Woord te aanvaar en dat hulle besluite nie enige element van die Skrif sal weerspreek nie. 1 Petrus 1:23-25: …die lewende en ewige woord van God… en ook; Die mens is soos gras, en al sy prag soos ‘n veldblom; die gras verdor en die blom val af, maar die woord van die Here, dít bly vir ewig. Bid dus dat die beredenering van die saak vanuit die Woord sal voortvloei en nie deur menslike argumente en opinies nie. Verklaar en bid vanuit Psalm 119:160 – Op u woord kan ‘n mens hom geheel en al verlaat. Al u bepalings is regverdig. Hulle staan vas.
2. Vrees van die Here. Bid dat die vrees van God alleen, harte, emosies en gedagtes sal rig. (Spreuke 8:13).
3. Werk van die Heilige Gees. Bid vir die kragtige werking van die Heilige Gees om hierdie vergadering te lei, sodat daar met goddelike wysheid oor die saak besin kan word en besluite geneem sal word wat God sal eer.
4. Manipulasie. Bid vir die verbreking van die invloed van alle drukgroepe (ook sekulêr), wat die kerk in rigtings wil indwing en manipuleer om kompromieë aan te gaan. Bid dat elke gedagte, gevoel, emosie en opregte bedoeling (2 Korintiërs 10:4-5), steeds ondergeskik sal wees aan die soewereiniteit van God se wil en die Woord wat altyd ver bokant die insig van mense is. (Jesaja 55:8-9). Bid dat daar geen indoktrinasie sal wees nie, geen onwaarhede verkondig sal word nie, geen emosioneel belaaide aantygings gemaak sal word, of enige vorm van opsweping sal plaasvind nie. Bid dat die Gees van die Here sal verhinder dat mense mekaar beskuldig, en dat geen voorleggings gemaak sal word of redenasies gebruik sal word wat Jesus Christus oneer sal aandoen nie.
5. Eenheid. Daar is intense verskille oor die interpretasie van kerkwette en die regsgeldigheid van besluite van die 2015 Sinode, asook oor hoe die Sinode hierdie sake kerkregtelik moet hanteer. Bid veral dat die Sinode nie sal vasval in tegniese gesprekke oor interpretasie van kerkwette nie, en dat onduidelikhede maklik uit die weg geruim kan word in eenheid.
6. Verbreking van werking van bose magte. Bid vir die verbreking van elke vorm van demoniese invloed wat die Sinode wil verhinder om met waarheid, liefde en eensgesindheid sy werk te doen, en wat verdeeldheid wil saai. Bid ook vir die verbreking van alle misleidende gedagtes en drogredenasies wat nie in lyn met die Woord is nie, en nie die gesag van die Skrif aanvaar en aan Christus ondergeskik is nie.
7. Eenvoud en duidelikheid. Bid dat die Sinode sy besluite op ‘n eenvoudige en duidelike wyse sal formuleer. Dat daar nie formulerings sal wees wat ruimte sal skep vir misverstande oor presies wat die besluite behels nie.
8. Groot opdrag. Bid dat hierdie spesiale Sinode die belangrikheid van die groter verantwoordelikheid van die verkondiging van die evangelie sal beklemtoon, en die kerk opnuut sal oproep tot intense gebed vir geestelike vernuwing en herlewing.